Heiterebeck!
Samichlaus, ich freue miich,
äntli bisch du cho!
Wieso häsch de Esel niid
au grad ine gno?

Heiterebeck! Dä armi Kärli,
immer muess er warte!
Hett ihm gärn miis Zimmer zeigt
und verzellt vom Chindergarte
s Bastelzüüg und überhaupt,
all min tolle Plunder.
Samichlaus, chasch sicher sii,
es näämt de Esel wunder.

Samichlaus, wänn wider chunsch
bitte dänk dänn draa,
lass diin Esel s nächschti Jaar
nid verusse staa! 

Ich bin en chliine Stumpe
Ich bin en chliine Stumpe,
tue gärn chli umegumpe,
e Lumpenornig mache
mit mine viele Sache.
Tue mängsmal gar nid lose,
ha Fläcke a de Hose,
tue vielmal umestaa
statt gschnäll hei-zue gaa.
Doch törfsch du d‘Muetter frage,
ich tue keis Tierli plage.
Drum Chlaus bis doch en Guete,
verschon mi vor de Ruete!
Bring doch nur gueti Sache,
wie tätsch du Freud mir mache!
Und gäll, säb weisch sit färn,
iich han mis Mammi gärn!

D`Stube isch no hell
D‘Stube isch no hell.
Samichlaus, chumm schnäll!
Au zu miir, iich bitt;
aber d`Ruete nimm nöd mit!

Bliib nöd duss im Gang!
Lueg nu, wien i plang,
bis d mer öppis gisch,
wil d en Guete bisch.

Pack jetz weidli us!
Mach di breit im Huus!
Nachher will i glii
ganz e Bravi sii. (en Brave sii)

Was isch säb für es Liechtli?
Was isch säb für es Liechtli?
Was isch säb für en Schii?
De Chlaus mit de Latärne
lauft grad de Wald dur ii.

Sin Esel, de hed glaade, er rüeft, J-aa, J-aa!
Hüt törf iich mit miim Meischter emal is Stettli gaa!
Im Sack, da häts vill Nüss, au Tirgel Zimmedschtärn,
die träg ich, wärs en Zentner,
für d‘Chinde no so gärn!

Samichlaus, wo chunsch du häär?
Samichlaus, wo chunsch du häär?
Siebehundert Stund wiit häär!

Samichlaus, isch diis Säckli schwäär?
Siebehundert Pfund isch s schwäär!

Samichlaus, machs ganz gschnäll läär!
Dänn isch diis Seckli nüme schwäär!

Samichlaus iich bin en Bängel
Samichlaus iich bin en Bängel
schläck sooo gern Zuckerstängel

chönti mir schoggi schnabuliere
wett ali Guetzli uusprobiere

uf Chueche han i Appetit
Chaugummi chätsche isch en Hit

doch öppis liigt mer zimli fern
Zääputze tueni gar nöd gern

In der Kürze liegt die Würze

Hü Trämpeli
Es nachted scho und s schneieled,
du liebi Zyt, ganz grüüsli,
de Chlaus leit jetzt sin Mantel aa,
und bschlüsst no gschnäll sis Hüüsli.

Er holt de Schlitte us em Schopf,
spannt s Eseli gschwind aa,
und ladet d‘Säck und d Fitzen uuf,
won er für d‘Chind mues haa.

Hü Trämpeli, seid er «s isch Ziit,
de Wäg is Schtettli isch no wiit!
Miir händ hüt Abig gar vill z tue,
hü, Trämpeli, lauf artig zue!

Wie sind die Seck so dick und schwär,
wer chunnt ächt d Fitzen (Nüssli) über, wer?
De Chlaus weiss alles ganz genau,
drum, Chinder, bitte – folged au!

S’isch wieder emol so wiit
S’isch wieder emol so wiit,
sie isch da die wunderbari Ziit.

D’Ziit wo überall Cheerzli bränned,
und wo mir tüend Adväntsziit nänne,

i däre Ziit chunt au dä Samichlaus mit em Schmutzli uf Bsuech
mitbringe tüends en schwere Sack und es dicks Buech.

Z’erscht erfahred die chliine und au grosse Chind,
öb sie s’Jahr dure dänn au lieb gsi sind.

Nach däm grosse Herzlichlopfe
Dörfed mer uf es Säckli hoffe!

Wänn dä Chlaus mit em Schmutzli wieder gaht,
wüssed mir, dass d’Wiehnacht vor der Tüüre staht.

Mir wüssed jetzt isch Ziit zum Guetzli bache
und für d‘Wiehnacht Gschänkli mache!

Ach wie gnüss iich doch die Zit,
wänns richtig Wiehnachtsstimmig git!

So wünsch ich Eu es schöns Wiehnachtsfescht,
und fürs nöchschti Jahr numme s’Bescht.

Ich ghöre n es Glöggli
Ich ghöre n es Glöggli deht im Wald,
ich glaub de Samichlaus chunnt bald!

Ich gsehn en .... das muess en sii
und de Schmutzli hät er au debii.

Uf em Rugge en schwere Sack .... i dä Hand es dicks Buech
ich glaub die chömmed zu öis uf Bsuech!

Hoffentlich händs im Buech numme Guets gschri(iii)be
und tüend ganz lang bi öis bliibe.

Wänn ihr dänn wieder gönd, tänked draa,
de Inhalt vom Sack chönnder bi öis laa.

Dänn händ all öpis devoo,
dä Schmutzli lauft gschnäller und öisi Herzli machts froo!

Scho wieder isch es Jahr verbii
Scho wieder isch es Jahr verbii,
sit däm Ihr bi öis sind gsii.

Bi Eurem Bsuech chömmed mir immer wieder Erinnerige in Sinn,
wo au ich no es Chind gsi bin.

Wo ich mit grosse Auge gfröged ha,
„Samichlaus – törf iich es Manderindli ha?“

Eure Bsuech hät mir au immer wieder verrate,
das ich nümme lang muess uf’s Chrischtchindli warte!

So isch de Dezember en spezielle Monet gsi,
und iich han gstrahled wie en Sunneschii!

Au hüt gits im Dezämber no spezielli Momänt,
wo miis Herzli pöpperlet ganz vehemänt.

Und wänns dänn i de Wienachtsziit so richtig aafangt chrible,
so muess iich säge, ich bi doch no es Chind blibe!

Im Name vo allne aawäsende Lüt, (kurz lesen!)
säget mir Dir Danke für dä Bsuech vo hüt!

Scho 365 Tääg vergange
Hej, wie gaht die Ziit so schnäll verbii,
mir chunnts vor, als obs ersch geschter isch gsii!

Doch es sind scho 365 Tääg vergange,
sit dem mir eu händ z’letscht mal törfe n empfange.

Au dasmal sind Ihr dur dä tüüfi Wald zu euis choo,
und dä schweri Sack händ Ihr au mit eu gnoo.

Ich hoffe Ihr händ für alli öpis debii,
schliessli si miir fascht immer liebi gsi!

So danket mir eu, dass Ihr euis nöd händ vergässe,
und sie nöd verlore händ, euisi Adrässe!